Myndir

Þá er ég búin að setja fleiri myndir í júlí 2008 albúmið.

Við fórum á ströndina í dag til að slappa af, veiða krabba og krossfiska, leika í sjónum og liggja í sólbaði. Árni Þór lá mest allan tíman og brann ekki neitt, ég lá í smátíma og brann helling á bakinu (var samt með sólarvörn), var nú ekki ánægð með þetta, þar sem mitt plan var að vera dugleg að bera á mig og verða bara brún en ekki RAUÐ.

Eftir ströndina náðum við í Kormák sem var búin að vera að leika hjá vini sínum og fórum heim. Ég og Jón ætluðum að setjast út á svalir og fá okkur bjór, en við fórum fljótlega inn, þar sem hitinn var svo mikill að við gátum ekki meir.

Jón Óskar og Árni Þór eru nú á tónleikum með Iron Maiden, það er nú búin að vera mikill spenningur með það og Árni hefur talið niður dagana, þannig að hann var mjög ánægður að fara LOKSINS á þá. Ég fór nú með strákana á videoleiguna og þeir tóku sér eina mynd og ég eina konumynd handa mér. Aldrei þessu vant vildu þeir ekki horfa með mér heldur bara inn í herbergi, þannig að ég sit þá bara og blogga eitthvað bull í staðinn.

Jæja elskurnar

knús og koss frá okkur í hitanum (33 gráður á mælinum okkar í dag)

Bergþóra og co

Megnið af gestunum eru farnir heim.

Hæ! Eins og ég var búin að segja komu Gyða, Beggi, Bergsteinn og Árni Þór til okkar á fimmtudaginn í síðustu viku. Jón fór út á flugvöll að ná í þau á meðan ég svaf aðeins lengur og tók svo til morgunmat fyrir þau. Þau vildu nú aðeins leggja sig (bara búin að vaka í sólahring), ég skildi það nú ekki, ennnnn. Seinni partinn kíktum við aðeins á göngugötuna og í Bryggen, fengum okkur ís og gaman.

Föstudaginn fórum við til Þýskalands, þar sem við náðum okkur í bjór, rauðvín, gos, nammi, föt ofl. 

Laugardeginum var eitt í Kolding Stor Center, þar sem fleiri peningum var eytt.

Stefnan var tekinn á Legoland á sunnudeginum. þar var rigning á köflum, en við skemmtum okkur alveg konunglega þrát  fyrir það. Það var lítið að gera og gátum við bara farið í hvert tækið á eftir öðru og skoðað allt vel. Þegar heim var komið tókum við okkur til og fórum út að borða á Jensens Böfhus, algjört æði.

Allir fengu að sofa út á mánudeginum og nýttu unglingarnir sér það heldur betur, við Gyða ákváðum reyndar kl 14 að nóg væri komið og vöktum þá. Þá kíktum við á Himmelbjerget, fengum með okkur nesti og löbbuðum aðeins þar um. Mér fannst þetta nú rosalega flott, en voða ómerkilegt líka miðað við hvað ég hafði ímyndað mér.

Nú kemur aðalsagan, sitjið þið ekki örugglega, þetta er voða spennandi, hehehe. Við fórum í Djurs sommerland, þetta er einn af vinsælustu skemmtigörðum Danmerkur, þar er td stærsti rússíbaninn og ég sagði við Jón "ég fer ekki í þetta, sjáðu hvað hann fer hátt" (32metra upp í loftið), "jájá, þú kemur nú samt" sagði maðurinn minn. Og viti menn ég lét mig hafa það að fara í hann, ég hélt hreinlega að ég mundi deyja þegar við vorum að dragast upp. En vá hvað mér fannst þetta gaman, enda fór ég líka aftur rétt áður en við fórum heim. En ekki nóg með þetta, ég fór í Örninn líka, en í honum dregst maður upp í 20 metra hæð, snýst þar (mjög hratt að mér fannst) og svo dettur hann niður til hliðanna 4 sinnum á meðan. GUÐ MINN GÓÐUR HVAÐ ÉG VAR HRÆDD, ég get sagt ykkur það að ég öskraði svo hátt að ég var aum í hálsinum, ÉG FER ALDREI Í HANN AFTUR, þetta var nóg fyrir mig. Jæja eftir öll ævintýrin þarna fóru Gyða og co að borða, en við hin keyrðum heim og fengum okkur SS pylsur og Myllu pylsubrauð og SS pylsusinnep(Árni Þór tók þetta með sér), mmm algjört nammi.

Afslöppun var í fyrirrúmi á miðvikudaginn, enda allir búnir á því eftir vikuna, en gaman var þetta allt. Takk fyrir komuna Gyða, Beggi og Bergsteinn þetta var alveg frábær vika.

Jæja ég sit inn myndir (þá fáið þið að sjá hvað ég var hrædd í Erninum) og skrifa meira vonandi bara á morgun eða hinn.

Knús og koss

Bergþóra og co

Hún á afmæli í dag, hún á afmæli í dag...........

Hún á afmæli hún Valgerður, hún á afmæli í dag. Elsku Valgerður okkar innilega til hamingju með daginn. Hafðu það gott í dag og við hringjum í  til ykkar í kvöld.

Endalaust af knúsi og kossum.

Bergþóra, Jón Óskar, Kormákur Helgi, Kristófer Ingi og Árni Þór

AFMÆLISKVEÐJA:)

ELSKU HALLDÓR INNILEGA TIL HAMINGJU MEÐ DAGINN. VONANDI ERTU BÚINN AÐ EIGA GÓÐAN DAG OG VONANDI VERÐUR KVÖLDIÐ ENN BETRA.

KNÚS OG KOSSAR FRÁ OKKUR HÉR Í DANAVELDI.

Sending að heiman:)

Maður verður sko ekki fyrir vonbrigðum með gestina sem koma til okkar. Við fengum Árna Þór, Gyðu, Begga og Bergstein til okkar í nótt, þau lentu kl.5 í morgun. Jón Óskar fékk heiðurinn af því að vakna kl 4 og ná í þau, á meðan svaf ég og Jón hringdi svo þegar þau voru á leiðinni heim og ég tók til morgunmat. Allir komu með eitthvað handa okkur, Gyða og co komu með Cheerios og Lucky Charms, takk æðislega fyrir það. Mamma og pabbi sendu okkur alveg helling, flatkökur, hangikjöt, skonsur, SSpylsur, piparsósu, sverð handa Kristófer "vá mamma, sjáðu hvað þetta er flott" og svo fengum við hjónin eina óvænta gjöf og mig er nú búið að langa lengi í þetta. Elsku mamma og pabbi takk alveg æðislega fyrir okkur, það var mikil hamingja hér á bæ. Flestir reyndu svo að leggja sig, en Jón fór að horfa á sjónvarpið, enda vanur að vakna snemma. Ég gafst upp eftir klst, Árni Þór stuttu seinna og svo Beggi. Þannig að ég fór snemma að klára innkaupin sem ég ætlaði að gera í gær, Beggi fékk smá sightseen út úr því, þar sem ekki var búið að opna búðina þegar við komum. Strákarnir himinlifandi að Árni var með þeim heima.

Ég og strákarnir fórum á flakk í gær með Rúnu, Karen Rós og Emmu Silju. Meðal annars var farið á göngugötuna að kaupa föt á liðið, Den gammel by í Aarhus, þar var labbað um og öll gömlu húsin skoðuð, farið í hestvagnaferð og keyptar kökur í bakaríi frá 1700 og súrkál. Gaman að segja frá því að þetta líkist svolítið Árbæjarsafninu og þangað hef ég aldrei farið, þrátt fyrir að hafa búið í Reykjavík i 20 ár, alltaf svo menningarleg. Þaðan var farið í Ikea, ég keypti mér fleiri glös og maðurinn minn leit bara á mig eins og ég væri gjörsamlega búin að missa vitið, honum finnst við nefnilega eiga nóg af glösum og ég skil það ekki. Eftir Ikea fórum við í Bilka og þaðan og heim. Við vorum komin heim um kl 22:30 í gærkvöldi, eftir langan og skemmtilegan dag. En einu sinni komst ég að því hvað gps tækið getur sparað mikinn tíma, Rúna greyið var að elta mig og svo þegar við áttum að beygja út af, var brjálað að gera hjá henni og hún missti af mér, þannig að ég beygði út af og hún hélt áfram. En með hjálp tækisins var ég ekki lengi að finna hana aftur og koma okkur á réttan stað.

Jæja elskurnar, ég vona að gestirnir mínir séu að fara að vakna þannig að við getum gert eitthvað. Jón Óskar er loksins komin í sumarfrí og nú á bara að njóta þess að vera í fríi og gera eitthvað skemmtilegt.

Knús og koss

Bergþóra og co

Ég rakst á þetta á heimasíðunni hjá Guggu og....

ákvað að stela þessu. Mér finnst nefnilega að stundum eigi maður að hugsa meira um það að leifa börnum að vera börn í stað þess að leiðrétta allt sem þau gera og segja. En að sjálfsögðu þurfum við að hafa takmörk líka. Ég veit bara hvað það er mikilvægt að fá að vera barn og foreldrar elski mann skilyrðislaust, þetta lærði ég af mömmu og pabba og ég færi þetta á mín börn, sem ég elska meira en allt annað. 

Í dag...
ætla ég að brosa til þín þegar augu okkar mætast...
og hlæja þegar mig langar frekar til að gráta...
ætla ég að leyfa þér að vakna mjúklega, vafin inn í sængina þína og halda á þér í fanginu þar til að þú ert tilbúinn fyrir nýjan dag...
ætla ég að leyfa þér að velja hvaða föt þú ferð í, brosa og hrósa þér fyrir ,,fullkomna" litasamsetningu...
ætla ég að gleyma óhreina tauinu og fara frekar með þér út á leikvöll...
ætla ég að geyma óhreinu diskana í vaskinum og hjálpa þér að púsla nýja púsluspilið þitt...
ætla ég að slökkva á símanum og tölvunni og fara með þér út og blása sápukúlur...
ætla ég að bjóða þér upp á ís í innkaupaferðinni í stað þess að byrsta mig um leið og þú ferð að suða um hann...
ætla ég ekki að hafa áhyggjur af því hvað þú ætlar að verða þegar þú verður stór...
ætla ég ekki að hafa bakþanka um allar ákvarðanir sem ég tek í uppeldinu og fyrir þína hönd...
ætla ég að leyfa þér að baka með mér bollur og ekki hnoða þær allar aftur þegar þú sérð ekki til...

Í kvöld...
ætla ég að halda á þér í fanginu og segja þér frá deginum þegar þú fæddist og hvers vegna mér þykir svona vænt um þig...
ætla ég að leyfa þér að busla og skvetta í baðinu og ekki verða reið út af vatninu á gólfinu...
ætla ég að leyfa þér að vaka lengi og skoða stjörnurnar á himninum...
ætla ég að kúra hjá þér eins lengi og þú vilt, þó að ég missi þá af uppáhaldsþættinum mínum...
ætla ég að dást að þér og vera þakklát fyrir að eiga gersemi eins og þig...
ég er svo heppin að eiga þig og bið ekki um neitt... nema annan dag með þér...
 

Smá væmni í gangi, en það er nú líka allt í lagi svona inn á milli. Jæja farin að hjóla á pósthúsið.

Knús og koss

Bergþóra

Pínu pons!

Eins og ég sagði í síðustu færslu þá vorum við á leiðinni í Madsbyparken í Fredericia, en á leið okkar þangað rákumst við á annan spennandi stað. Það var Trelde næs, strandlengja þar sem hægt er að labba um, leika sér í sjónum, og skoða skóginn í kring. Það gerðum við og nutum þess bara að vera úti, labba á tánum í sandinum og svona og borða nesti. Strákarnir voru ekki alveg sáttir þegar við fórum heim og hefðu alveg vilja vera lengur, en þar sem frúin á heimilinu neyddist til þess að afþýða ísskápinn var það ekki hægt.

Annars bíða allir spenntir hér að fá heimsókn á fimmtudag, en það eru Árni Þór(Bróðir), Gyða(systir Jóns), Beggi og Bergsteinn, okkur finnst nú voða heppilegt að þau koma öll með sama fluginu, því þá er bara ein ferð út á flugvöll (reyndar ekki langt að fara, þar sem þau fljúga á Billund). Árni verður hjá okkur í rúmlega 2 vikur, en Gyða og co verða í viku. Kristófer bað afa sinn að smíða fyrir sig sverð sem Árni átti að koma með, og hann er mjög spenntur yfir því. Kormákur vildi fá hníf og vonandi hefur afi náð að klára hann líka. Ég fæ sent Cheerios og Lucky Charms, alltaf að nota ferðirnar, en samt verður maður að passa sig, ég gæti beðið um endalaust af einhverjum vörum sem maður saknar. En er það ekki bara hluti af því að búa annarsstaðar og þeim mun betra er þetta þegar við komum til Íslands.

Jæja hef svo sem ekkert að segja, langaði bara að bulla smá.

Knús og koss

Bergþóra og co

 

Vika síðan síðast.

Tíminn líður hratt, á gervi hnatta öld...... nei, nei bara smá djók. Það er nú ekki mikið búið að gerast hjá okkur þessa vikuna. Ég fór í sund á mánudag með strákunum og skemmtum við okkur mjög vel í rennibrautinni og að leika að ýmsu dóti sem var þarna í sundlauginni.

Á föstudag buðum við Rögnu og co frá Silkeborg til okkar í mat og gæddum við okkur á síðasta íslenska lambalærinu okkar, mmmm það var náttúrulega bara algjört æði og í eftirrétt fengum við okkur frost og funa, sem er ís með marengs ofan á, þetta kom nú bara á óvart og smakkaðist alveg hreint frábærlega. Takk fyrir komuna og heimalöguðu sultuna, þetta var rosalega gaman.

Kristín, Kalli, börn og foreldrar hans komu svo til okkar í gær aftur. Við vorum hérna tilbúin með heit rúnstykki, vínarbrauð og fleira í morgunmat þegar þau komu. Við skelltum okkur svo í Legoland þar sem við fengum rigningu og sól til skiptis. Börn og fullorðir skemmtu sér allir mjög vel í tækjum og skoðunarferðum í búðum, útsýnisturni ofl. Þegar heim var komið eftir mjög langan dag í Legolandi (8 tíma) grilluðum við okkur kjúkling, fengum okkur rauðvín og bjór með og kjöftuðum aðeins meira. Þau héldu svo aftur yfir á sjáland, en þau eru að fara heim til Íslands á morgun.

Jæja það er nú ekki meira að segja í bili, við erum að fara í Madsbyparken að leika okkur í smá stund eða langa stund kemur í ljós.

Knús og kossar

Bergþóra og co.

P.s munið að kvitta í gestabókina eða við færslurnar. Það eru komnar inn einhverjar nýjar myndir í Júlí albúmið.

 

Brjálað að gera:)

Elsku Valgerður og Halldór innilega til hamingju með 1 árs brúðkaupsafmælið, þetta er ekkert smá fljótt að líða, mér finnst ég vera nýbúin í brúðkaupinu ykkar. 1000 kossar og knús.

Jæja það er nú ágætlega mikið búið að gerast hjá okkur síðustu daga, byrjum á fimmtudeginum: Ég og strákarnir vorum heima að taka til, versla, þrífa bílinn, púsla ofl á meðan við biðum eftir Kristínu, Kalla og co. Þau eru með hús i Holdbæk (bær ekkert svo langt frá Köben) og kíktu til okkar. Við þurftum nú að fara út og finna þau, þar sem þetta fína Garmin leiðsögutæki sendi þau bara einhverja vitleysu (það gerir nú TomTom ekki)hehehe. Jæja Kristín hringir og segir jæja núna erum við vilt, ég var ekki alveg 100% viss um hvar þau væru  þannig að ég segi strákunum að við verðum að fara út og leita að þeim. Ég hef nú bara aldrei séð strákana svona fljóta út í bíl "Kormákur drífðu þig, Þau eru tínd, við verðum að finna þau", sagði Kristófer, en ég fann þau nú fljótlega. Jæja við komumst nú heim og fórum í það að elda kjúkling í kóki (algjört nammi). Að sjálfsögðu kjöftuðum við svo bara fram eftir kvöldi.

Föstudagur- Við röltum bara niður í bæ, kíktum í búðir, og fengum okkur ís. Ég og Kristín tókum þátt í einhverri könnun um áleggsumbúðir og fengu allir fría drykki á meðan þau biðu eftir okkur, við fengum svo að eiga spægipylsu, Kormáki fannst það nú ekki leiðinlegt. Það var að sjálfsögðu grillað í góða veðrinu, fengum okkur bjór og rauðvín og svitnuðum eins og svín í þessum 30 stiga hita sem var úti, úfffff, bara heitt. Krakkarnir spiluðu Hættuspilið og Monopoly, horfðu á mynd, borðuðu nammi og snakk, svakalega góð saman öll og skemmtu sér vel.

Laugardagur- Vöknuðum í róleg heitunum, Kristófer fyrstur og skildi ekkert í þessum svefn á liðinu "mamma getum við ekki bara vakið þau", hehe. Kristófer var alveg yfir sig hrifinn af Maríu og vildi bara vera hjá henni (stundum var hún nú svolítið þreytt greyið, en hann var mjög duglegur að hlusta á hana), honum fannst nú ekki leiðinlegt heldur að Kalli slóst við hann, ég hélt að barnið myndi míga á sig úr hlátri. Eftir slagsmál, morgunmat og nestistiltekt var haldið í Löveparken. En við fundum nú samt út að heita vantið var farið,hmmmm og kom það ekki á aftur fyrr en um hádegi á sunnudag. Þar eyddum við deginum í bongó blíðu, skoðuðum dýrin, lékum okkur og skemmtum okkur konunglega. Kristófer sagði þarna nokkrum sinnum "þarna var ég með leikskólanum mínum" eða "þegar ég var hérna með leikskólanum mínum þá...." og svo heyrðist "mamma, það er nú gaman að hafa svona gesti". Eftir að við komum heim fóru einhverjir í kalda sturtu og guð minn góður hvað hún var köld, ég saup hveljur.

Sunnudagur- Vöknuðum snemma og fengum okkur morgunmat. Kristín og co þurftu að vera komin til Köben upp úr hádegi til að ná í foreldra Kalla, en þau ætla að vera með þeim í viku. Kristófer slóst nú einu sinni en við Kalla og Kormákur slóst í hópinn, svaka fjör. Þá var bara litla fjölskyldan eftir í kotinu. Við fórum ekki út fyrir hússins dyr allan daginn, ég og Kormákur vorum á náttfötunum allan daginn, en Jón og Kristófer fóru nú í föt. Jón horfði á formúluna, ég og strákarnir horfðum á mynd og svo var bara sofið ef við vorum þreytt osfrv. Við spiluðum nú monopoly svona til að gera eitthvað annað en að vera í leti, Kormákur vann og fannst það nú ekki leiðinlegt, mér til mikillar armæðu þar sem ég var nú búin að lýsa því yfir að ég ætlaði að mala þá alla.

Mánudagur- vaknað seint, farið í sund, versla og heim, ekkert annað. Þrumur og eldingar úti og rigning.

Jæja nenni ekki meira núna.

Knús og koss

Bergþóra og co

 

Sumarfrí

Ingimundur töffari, bara búinn að læra að hjóla, alveg frábært hjá þér, það er svo miklu skemmtilegra að hjóla án hjálparadekkja. Passaðu þig að gera ekki alveg út af við rassinn á mömmu þinni,hehehe. En rassinn venst því að hjóla, trúðu mér Jóhanna,hihihi.

Ég er búin að vera í fríi í tvo daga með strákunum. Í gær fórum við í hjólatúr niður á leikskóla, þar sem ég ákvað að gefa þeim útiföt sem voru orðin frekar léleg (svona aukaföt). Við komum svo við í Netto til þess að kaupa kjötbollur, Kristófer pantaði nefnilega kjötbollur með hrísgrjónum og karrýsósu. Þá sagði pabbi hans "já, segðu mömmu að það sé upplagt í hádegismat", hehe, gott hjá honum, þar sem hann er nú ALLS EKKI hrifinn af karrý.

Við neyddumst svo til að fara á rúntinn upp í Give, þar sem nágrannakona Óla og Ástu hélt að það væri búið að brjótast inn (þau eru í Búlgaríu, en ég með lykil.), en sem betur fer var það ekki svo.

Eftir að heim var komið fórum við í annan stuttan hjólatúr, ég get sagt ykkur það að ég var ekki vinsæl mamma. En þetta hafðist allt saman og slöppuðum við svo bara af þegar við komum heim.

Í morgunn byrjaði ég á því að taka til (er að taka alla skápa í gegn), á meðan strákarnir voru að púsla og mála. Kíktum aðeins í bæinn og svo er bara að klára eldhúsið, púff. Við erum nefnilega að fara í Legoland aftur á morgun, mikil tilhlökkun hér á bæ. Ég aftur á móti skil ekki alveg að börn fái ekki leið á þessu, en þeim finnst þetta gaman og þá er ég til í að vera þarna á hverjum degi.

Knús og koss

Bergþóra og co