3 dagar...

fram að jólum eins og flestir vita. Við erum búin að taka aðventunni afskaplega rólega og bara dunda okkur við allt og ekkert. Ég fékk óvænt jólafrí fyrir rúmlega viku. Ég átti að mæta í skólann á miðvikudaginn í síðustu viku en þar sem kennarinn komst ekki fyrir snjókomu og vöruflutningabílum sem voru þvers og kruss á veginum var enginn kennsla og ég þar með komin í jólafrí og var ekki búin að vera í skólanum í 6 daga. Núna bíð ég bara eftir að fá alla þrjá strákana mína í jólafrí. Strákarnir verða í skólanum á morgunn líka, reyndar verður það bara jóla jóla þannig að það verður bara gaman. Ég er að vísu spennt að heyra hvað Kristófer gerði í skólanum í dag þar sem það var eitthvað leyndarmál í gangi sem þarfnaðist þess að það væru hlý föt og stígvél hmmmm. Ekki það að það er ekki séns að senda börnin út nema dúðuð í kuldagalla og allt tilheyrandi, þar sem það er -5 og alveg niður í -11 stig þessa dagana, en fallegt er veðrið og æðislegt að hafa snjó. Núna þarf bara að plata kallinn með út og renna á sleða með strákunum.

Um helgina fórum við á göngugötuna í Vejle þar sem við skiptum okkur niður svo að strákarnir gætu keypt jólagjöf handa hvor öðrum. Jón og Kristófer fundu eitthvað handa Kormáki í fyrstu búðinni sem þeir fóru í en Kormákur dró mig búð úr búð til að finna eitthvað handa Kristófer en sá bara eitthvað sem honum sjálfum langaði í, en á endanum tókst honum nú að finna jólagjöf handa bróður sínum. Við enduðum svo á kaffihúsi þar sem við hlýjuðum okkur með heitu kakói og kökum, enda veitti ekki af í 5 stiga frosti og já það er kalt í DK í -5 gráðum. Eftir þetta kíktum við til Horsens á jólamarkaðinn þar, mjög gaman en svakalega kalt þar -11 stig, brrr. Þarna fengum við að smakka síld sem var marineruð í appelsínu og piparrót, mmm svaka góð en nánast frosinn í þessum kulda, hehe. Fengum okkur að sjálfsögðu jólaglögg og strákarnir heitar vöfflu og Crepes. Þegar heim var komið var bara slappað af og náð í sig hita eftir langan skemmtilegan en kaldann dag.

Í gær var ekkert gert nema að strákarnir fóru niður í skóla að renna sér á sleða.

Í dag er það búið að vera tiltekt og þrif þannig að það þurfi kannski rétt að skúra yfir gólfin fyrir jólin. Sem sagt allt tilbúið, öndin að þiðna í ísskápnum og allt hreint og fínt.

Á Þorláksmessu fáum við Elísabetu og fjölskyldu í smá kaffi þar sem verður boðið upp á heimabakaðar eplaskífur, jólaglögg og eitthvað fleira góðgæti.

Ég reyni svo að setja inn myndir núna fyrir jóla og svo aftur eftir jólin.

Hafið það sem allra best um jólin og verið góð hvert við annað.

Risaknús og koss

Bergþóra og co

...........

Í dag var amma hans Jóns kvödd með miklum söknuði en fallegri athöfn að okkur skilst. Því miður áttum við ekki kost á því að vera þarna og kveðja hana, en hugsuðum mikið heim í dag. Foreldrar Jóns komu til okkar 23.nóv og ætluðu að vera hjá okkur til 10.des, en flýttu svo að sjálfsögðu ferðinni um viku til þess að kveðja gömlu konuna. En við þökkum æðislega fyrir þessa daga sem þið voruð hjá okkur, þetta voru góðir dagar.

Á meðan ég hafði tengdó hjá mér fékk ég Vilborgu til að baka skeljar (voru í miklu uppáhaldi hjá Jóni sem krakka), mjúkan marengs úr eggjahvítunum mínum sem voru eftir úr smákökubakstrinum og svo skellti hún í rúgbrauð handa okkur líka. Við bökuðum svo vanilluhringi og kattatungur með ágætri aðstoð frá drengjunum, þannig að núna er ég búin að baka allar þær smákökur sem ég geri fyrir þessi jól og endaði það í 9 sortum (með kókoskúlum og sörum). Annars var lítið gert þar sem strákarnir voru veikir 5 fyrstu dagana og svo fór Jón að vinna aftur og enginn bíll til þess að fara neitt, en við vonum samt að allir hafi haft það gott. En jú tengdapabbi ákvað að elda handa okkur önd og höfðum við svona litlu jól áður en þau fóru heim aftur, rosalega notalegt og gaman, takk fyrir þetta

Við erum búin að ákveða að vera í mikilli afslöppun núna í aðventunni, fara í Horsens á jólamarkað, kannski Gammel by í Arhus ofl. En það kemur nú allt í ljós.

Núna í dag er ég búin að vera að gera laufabrauð, endar sennilega í um 40-50 kökum og geta þá strákarnir fengið að narta í þetta eins og þeir vilja. Það er samt ótrúlegur tími sem fer í þetta þegar allt er gert frá grunni. Ég flet út hverja einustu köku fyrir sig og svo skerum við út í þetta á morgunn og steikjum þær, svo er bara að vona að þetta komi vel út eftir steikingu.

Jæja ég ætla að halda áfram að horfa á Nutty professor 2.

Knús og koss

Bergþóra og co

AFMÆLI:)

Elsku Hlynur og Aðalheiður, innilega til hamingju með 6 ára afmælisdaginn. Vonandi hefur hann verið súper góður, með skemmtilegri veislu og fullt af pökkum.

Afmælis og saknaðarkveðjur frá okkur öllum í Gadbjerg.

Knús og koss

Bergþóra og co

HALLO

Þá er Kristófer orðinn veikur, sennilega með einhverja leiðinda flensu. Ekki mjög gaman að því þar sem foreldrar Jóns koma á morgunn. En það er ekkert við því að gera, við vonum bara að hann hressist fljótlega.

Ég er alltaf í skólanum, en síðustu tvær vikur það hafa verið sóun á tíma að mínu mati. Núna fer þó að byrja skemmtilegt tímabil með greinaskrifum, jóla fyrirlestri ofl skemmtilegu.

Jón Óskar er búin að vera heima núna í 2 vikur og er 3 vikan að byrja þar sem hann fer sennilega ekki í vinnuna vegna veðurs. Hann er þó búinn að dunda sér hér heima og setja upp jólaskraut og seríur í glugga. En núna þegar það er búið veit hann ekkert hvað hann á að gera. Hann heppinn að geta þá stjanað í kringum mömmu sína og pabba.

Kristófer fór á tónleika í Vandel skóla á fimmtudaginn og skemmti sér konunglega. Núna í síðustu viku eru strákarnir búnir að vera með þemaviku í skólanum sem fjallaði um skólann í gamla daga, því að Gadbjerg skóli er að fagna 300 ára afmæli um þessar mundir. Þeir hafa fengið mat eins og var í gamla daga og var Kristófer með 2 sinnum að búa hann til en Kormákur 1 sinni. Kormákur fór líka til Ribe á tónleika og að skoða umhverfið þar. Þeir fengu ýmsar sögur(jólin, kennslustundir) frá gamla daga frá fólki sem kom í heimsókn og kennslu eins og hún var þá líka (fyrir utan það að prikinu var slept).

Eins og ég sagði áðan er Jón búinn að setja upp allt jólaskrautið og er ég og strákarnir byrjuð á smákökubakstri og hlustum að sjálfsögðu á tilheyrandi jólamúsík með. Frúin er svo búin að gera lagtertur, rúllutertur og konfekttertur fyrir jólin, þannig að það ætti að vera nóg til með kaffinu ef gesti ber að garði.

Jæja ég er farin að elda.

Kossar og knús

Bergþóra og co

Blablabla

Ég veit að færslurnar hér eru ekki margar enda alltaf það sama í gangi hér á bæ.

Byrjum þá samt á þessum leiðinlegu. Bíllinn hans Jóns hrundi þegar hann var á leiðinni í vinnuna á mánudaginn. Fengum að vita að þetta væri eitthvað í mótornum og þar sem það er búið að keyra bílinn svo mikið og bílinn gamall, vill bílvélavirkinn meina að það borgi sig ekki að gera við hann. Kostar mikið að rífa mótorinn í sundur og kannski ekki hægt að gera við hann. Næsta skref er því grafa upp peninga og kaupa annan bíl.

Við erum búin að kaupa allar jólagjafir og vorum við að klára að pakka þeim inn í gær svo hægt sé að senda til Íslands. Ég ákvað svo líka að byrja jólabaksturinn snemma og erum við búin að gera jólakókóskúlurnar, lagtertur og rúllutertur. Þetta geymist svo allt í frysti þar til líður að aðventunni. Það verður þó enginn bakstur næstu helgi þar sem okkur er boðið í 2 ára afmæli til Bjarna Haralds í Silkeborg á laugardaginn og þar verðum við í kvöldmat líka.

Kormákur bíður þó spenntur á því að byrja að baka sörur og smákökur því að þá fær hann núggathjúpaðar og súkkulaðihjúpaðar möndlur, honum finnst þær bara æði. En það verður mögulega helgina 21-23 nóv. Svo ætlum við bara að slappa af í aðventunni og dúlla okkur á jólamörkuðum og jólapunteríi heima fyrir, perla, föndra og eitthvað skemmtilegt sem okkur dettur í hug. Ég er búin að ákveða að í ár þegar kveikt verður á dagatalakertinu setjumst við saman niður og lesum jóladagatalið Á baðkari til Betlehem. Sem sagt eintóm rólegheit í aðventunni.

Mánudaginn 2 des, er SFO (gæslan) dagur og á að fara með 4- 5 bekk til Vejle þar sem þau verða allan daginn að dúlla sér á göngugötunni. Mælt var með að þau fengju vasapening þó max 50 dkr og Kormáki finnst það nú bara vera frekar lítið "mamma, maður getur nú ekki keypt neitt fyrir 50 kr", hehe, hann er algjör perla, fannst þetta pínu furðulegt, en ég sagði að þetta væri eyðslupeningur ef hann vill eitthvað að drekka eða nammi osfrv. Kristófer fer svo eitthvað annað, en ég veit ekki ennþá hvað það verður, en skemmtilegur dagur verður þetta hjá þeim.

Jæja nóg komið að bulli núna, er á fyrirlestri sem ég á að vera að hlusta á. En langar frekar að drífa mig heim til Jóns og fara niður í Kolding að ná í jólagjöfina hans.

Knús og koss

Bergþóra og co

hmmm

var ég ekki búin að lofa færslu hér á þriðjudaginn, en jæja hér kemur hún.

Elsku vinir og fjölskylda, héðan frá okkur er allt gott að frétta, hehe er þetta ekki formlegt og flott.... ennn nenni þessu nú ekki, hér kemur alvöru færslan " ég lofa".

Núna er munnlega prófið í Dansk, kultur og kommunikation yfirstaðið og náði ég með 4 í einkunn (langaði í hærra, ennnnn þetta virðist bara vera mín einkunn hérna í DK), 4 er ca 6-7 á íslenska skalanum, en ég er samt ánægð með þetta, þar sem ég náði og þarf því ekki að hugsa meira um þetta fag. Nema kannski rétt aðeins í lokaritgerðinni, en það er nú ekki fyrr en eftir eitt ár.

Eftir prófið er ég bara búin að nýta tímann hérna heima þar sem allt nema það allra nauðsynlegasta hefur fengið að bíða. Núna er búið að taka frystikistuna í gegn þar sem ég er að fá lambaskrokk um mánaðarmótin, það verður nú spennandi að smakka danskt lambakjöt þar sem allir segja að það sé ullarbragð af því. Núna vantar mig bara að taka alla skápa og skúffur í gegn og þá er nú aldeilis fínt hér á bæ.

Jón Óskar er að vinna alla helgina frá 06-18 þannig að við strákarnir ætlum að kaupa okkur pappírskarton og halda áfram með jólakortin og svo ætlum við að gera smá hrekkjavökuföndur.

Jæja ég ætla að rjúka í bæinn og versla smá, er að hafa foreldraráðsfund hérna heima í kvöld og ætla að baka eplaköku og gera almennilegt túnfisksalat.

Knús og koss héðan elskurnar mínar og munið að kvitta.

Bergþóra og co

 

 

LOKSINS.........

Það hlaut að koma að því að andinn kæmi yfir mig aftur, er bara EKKI búin að vera í stuði að skrifa núna síðasta mánuðinn. Er ekki einu sinni búin að standa mig í afmæliskveðjum, en þið verðið nú bara að sætta ykkur við það núna, hehe.

Við erum öll búinn að hafa það alveg þokkalegt hér á bæ og vonandi fer það bara batnandi. Ég er búin að troða mér í stjórn íslendingafélagsins og ætlum við að reyna að rífa þetta félag upp og gera eitthvað að viti. Fyrsti atburður þessarar stjórnar verður í Legelandet.dk, sem er svaka stór leiksalur fyrir börn og fullorðna og ég er alveg viss um að við eigum eftir að skemmta okkur konunglega.

Ég er síðustu tvær vikur búin að vinna að prófverkefni í faginu Dansk, kultur og kommunikation. Ég skilaði svo skriflega hlutanum á föstudaginn og fer svo í munnlegt á þriðjudaginn í næstu viku. Í munnlega hlutanum á ég að verja verkefnið mitt og ætla ég að búa til fingramálningu og sýna þeim spennandi myndir af strákunum í fingramálningargerð, svo er bara vonandi að þetta takist. Það verður allavega framhaldssaga af þessu, sama hvort ég næ eða fell.....

Ég, Kormákur og Kristófer erum komin í vetrarfrí núna í viku og ætlum sko að njóta þess. Búið að planleggja ýmislegt, en þið fáið ekki að lesa um það núna, hihihi, eruð þið ekki spennt.

Í gær fórum við í afmæli til Charlottu (dóttir Óla og Ástu) og enduðum svo í mat hjá þeim líka, þannig að þetta var langt en skemmtilegt afmæli. Takk kærlega fyrir góðan dag.

Strákarnir eru búnir að skera út í grasker fyrir hrekkjavökuna og eru bara mjög ánægðir með niðurstöðuna, enda líka svaka flott hjá þeim. Við setjum svo inn myndir um mánaðarmótin þegar hrekkjavakan sjálf er búin en þá verður gert eitthvað spennandi og öðruvísi.

Skrifa meira á þriðjudaginn eftir viku, og vonandi með góðar fréttir þá.

Knús og koss

Bergþóra og co

Hún á afmæli í dag, hún á

afmæli í dag, hún á afmæli hún Ingunn, hún á afmæli í dag.

Elsku Ingunn Rebekka, innilega til hamingju með 1 árs afmælið þitt. Eigðu góðan dag og vertu dugleg að láta pabba stjana við þig (Kristófer valdi þennan broskall sérstaklega fyrir þig).

Risaknús og kossar

Bergþóra, Jón Óskar, Kormákur Helgi og Kristófer Ingi.

:.........

Jæja á ekki alltaf að byrja á vondu fréttunum. Því miður komumst við hjónin af því í sónar á fimmtudaginn að það var enginn hjartsláttur hjá litla krílinu okkar. Það hafði verið dáið frá því á 7 viku (var komin rúmlega 12), við fórum því á Kolding sjúkrahús í gær í tilheyrandi aðgerð. Alltaf kemst ég betur að því hvað ég á góðan mann og yndisleg börn. Allir þrír búnir að standa sig eins og hetjur (ég hef nú samt náð að halda andlitinu fyrir framan strákana). En það er ekkert meira um þetta að segja.

Þá að góðu fréttunum. Í dag eigum við hjónin 12 ára samveruafmæli og ætlum að fagna því með því að liggja upp í sófa og slappa af (allavega ég, blóðlítil síðan í gær), Jón að tæma sundlaugina og þrífa hana, og svo á að elda íslenskar lambalærisneiðar eftir uppskrift sem Bjarni Gunnar bróðir Svölu vinkonu gerði, úr bókinni Landliðsréttir Hagkaupa.

Ætla að nota tækifærið núna líka og óska tengdamömmu innilega til hamingju með afmælið á morgun. Njóttu dagsins í botn. Risaknús og koss frá okkur öllum.

Jæja hef ekkert meira núna

Knús og koss, farið vel með ykkur

Bergþóra og co

Vá er maður orðin löt að skrifa hérna eða hvað....

Sorry Jóhanna mín, ég held að þú sért sú eina sem ekki færð neinar fréttir héðan.

En jæja, ég prófa núna, samt er alltaf allt við það sama hér á bæ.

hmmmmm, ok byrjum bara á því að ég þurfti að fara á spítalann í Vejle í pínu aðgerð og tók hún ekki nema 5 mín, en ég var látin sofa í 15 mín og vera niður á spítala í 9 tíma. Ég byrjaði nefnilega á því að fara til míns læknis og sendi hann mig á sjúkrahúsið og þar þurfti ég að bíða og bíða og bíða, vegna þess að ég var nýbúin að borða og þurfti að vera fastandi í 6 tíma áður en þeir mundu svæfa mig. En allt fór vel að lokum og var bara gott að komast heim aftur.

Við komumst svo að því fyrir 6 vikum síðan að við ættum von á öðrum fjölskyldumeðlim þann 23.mars 2010 (er núna á 12.viku). Strákarnir voru voða hissa og Kormákur grét af gleði og sagði "núna fæ ég þá kannski litla systur, það væri voða gaman". En núna er sem sagt rætt um það að það séu nú 50% líkur á því að við fáum 3 strákinn. En þetta verður mjög spennandi þar sem að þessi meðganga er enn sem komið er mjög ólík þeim fyrri. Á fimmtudaginn förum við svo í fyrsta sónarinn og er það hnakkaþykktarmæling. Hlakka svo til, þá verður þetta meira raunverulegt.

Núna er ég að berjast við að fá vinnu svo ég geti fengið fæðingarorlof, þar sem ég sem námsmaður í Danmörku á ekki rétt á orlofi því ég er ekki á SU og ekki að vinna. Annemette sem er starfsnámsleiðbeinandi er að hjálpa mér að finna vinnu og vona ég að það gangi upp sem fyrst. Eini gallinn á þessu er sá að ég verð þá sennilega að fara í frí frá skólanum frá miðjum okt og klára önnina á næsta ári, nema ég geti samið við yfirkennarann um að ég geti sleppt fyrirlestrum og skilað bara inn æfingum og verkefnum.

Annars er bara allt rólegt hér á bæ og vorum við að klára síðustu jólagjafirnar til Íslands í dag. Ekkert smá þægilegt að vera búin að þessu tímanlega og eiga bara eftir að senda þetta heim. Svo er bara litla fjölskyldan eftir, en það er nógur tími til þess.

Jæja lítið sem ekkert annað að frétta í bili. Skrifa meira á fimmtudag eða föstudag. En þangað til hafið það sem allra best.

Knús og koss

Bergþóra og co